Գոռ Մելքումյանը ԱՐԱՐ երգչախմբի հիմնադիր ղեկավարն է, երաժիշտ, դիրիժոր, ով գտնում է, որ «գոյություն ունի երաժշտության հետ հարաբերության մի սահման, որից սկսվում է զուգահեռ աշխարհի տեսունակությունը, և երաժիշտը այլևս փիլիսոփա է․․․»։ Նա ծնվել է Հայաստանի մայրաքաղաք Երևանում 1993 թվականին։ Երաժշտական նախնական կրթությունը ստացել է Ա. Տերտերյանի անվան երաժշտական դպրոցի ժողովրդական նվագարանների, Սայաթ-Նովայի անվան երաժշտական դպրոցի ժողովրդական նվագարանների և Ռ. Անդրեասյանի անվան երաժշտական դպրոցի փողային նվագարանների բաժիններում։ Ժողովրդական փողային գործիքներ է նվագել Յուրի Բախշյանի անվան մանկական ֆիլհարմոնիայի ժողովրդական գործիքների նվագախմբում, եղել է նվագախմբի մենակատար։ 2011-2013թթ․ նվագել է “Van project” նվագախմբում, նվագել՝ «Սասուն» ազգագրական երգի- պարի համույթում և մի շարք այլ նվագախմբերում։ 2013թ. ավարտել է Երևանի պետական մանկավարժական համալսարանի «Գեղարվեստական կրթություն» բաժինը։ 2010-2013թթ. եղել է ազատ ունկնդիր ԵՊՀ բանասիրության դասախոսություններին:2012թ.-ից զբաղվում է բանահավաքությամբ ՀՀ մարզերում, նյութերը արխիվացվում են ՀՀ գիտությունների ազգային ակադեմիայում։ Մասնակցել է մշակութային հետազոտությունների Թուրքիայում: 2013-2015թթ. անցել է պարտադիր ժամկետային զինծառայություն։ 2014թ. Ղազախստանում մասնակցել է ՀԱՊԿ զորավարժություններին։ 2013-2015թթ․ հիմնադրել և ղեկավարել է Տավուշի մարզի Կողբ և Բերդավան գյուղերի երաժշտական դպրոցների երգչախմբերը։